POKWANG, BAGONG COMEDY QUEEN NG DOS?

By Glen Sibonga

Natutuwa si Pokwang na bahagi ulit siya ng cast ng comedy-gag show ng ABS-CBN, ang Banana Sundae, ang dating Banana Split na binago ang titulo dahil napapanood na ito tuwing Linggo. Naging cast member siya ng Banana Split mula 2009 hanggang 2011.

Kasama ni Pokwang sa Banana Sundae sina Angelica Panganiban, John Prats, Jason Gainza, Pooh, Ryan Bang, Sunshine Garcia, Aiko Climaco, JC de Vera, Jobert Austria, Badji Mortiz, at Jessy Mendiola.
 
Samantala, sinasabing nang umalis si Ai Ai delas Alas sa bakuran ng ABS-CBN at lumipat sa GMA Network ay nabakante ang titulong Comedy Queen sa Kapamilya Network. Kaya ang tanong kay Pokwang ay paninindigan na ba niya ngayon ang 

pagiging Comedy Queen? “Wow, Comedy Queen talaga! Hindi naman po ako iyon. Alam naman natin kung sino si Comedy Queen,” aniya.
 
Pero bakante nga ang trono sa Kapamilya? “A, talaga po ba? Basta ako, masaya lang ako na kasama ko sila ulit (Banana Sundae cast), iyon lang po iyon. Basta happy ako na nagkasama-sama kami ulit at join forces kami na magbibigay po ng saya every Sunday.”
 
Paano kung ang mga tao at maging ang ABS-CBN na ang magbigay sa kanya ng titulong ito? “Basta ako, magtatrabaho lang ako, bahala na sila.”