DANIEL PADILLA WALANG PARTICIPATION SA CONCERT NI KARLA ESTRADA

​​Nagkaroon tayo ng pagkakataong makausap si Karla Estrada sa presscon ng kanyang concert na ginawa sa Felicidad Mansion sa may Roosevelt. “Ayokong ma-stress. Hahahaha!” Iyon ang panimulang sabi sa amin ni Karla nang magsimula na kaming magtanong sa kanya kaugnay ng kanyang concert entitled ‘THE QUEEN MOTHER IN CONCERT’.

“Actually kung ano ang ginagawa ko, yun din ang mapapanood ninyo, very Karla Estrada na may pagkaluka-luka.” Ayon kay Karla ngayon lang daw siya magkakaroon ng concert. “Noon kasing abala ako sa sarili kong career hindi ako nagkaroon ng ganitong break, pero sabi ko nga sa tamang panahon at ito na nga siguro ang tamang panahon.”
Aminado si Karla na muli siyang nagkakaroon ng puwang sa showbizlandia dahil sa tulong ng kasikatan ng kanyang anak na si Daniel na hindi naman itinatanggi ng singer-actress.
“Marami ang nagtatanong sa akin kung may participation si Daniel, hindi ko masagot. At for the first time…ikaw lang ang masasabihan ko dahil katatapos ko lang siya ngayong makausap…no, hindi siya kakanta sa concert ko.”
Nasabi ni Karla na kami ang una niyang nasabihan dahil late kaming dumating sa kanyang presscon at halos wala na ang ibang reporters. Nagkataon na habang kausap namin siya ay tinawagan naman siya ni Daniel Padilla. “Ayokong pilitin si Daniel na kumanta sa concert ko, kahit anak ko siya siyempre may sarili siyang desisyon pero ang sabi niya sa akin kahit hindi daw siya kumanta ay pupunta siya sa concert at susuporta siya sa akin.”
Sa Kia Theater sa Araneta Center gagawin ang kauna-unahang concert ni Karla at ngayon pa lang daw ay kinakabahan na siya dahil matagal daw siyang nawala sa showbiz at ngayon lang uli siya kakanta nang bonggang bongga.
Ni Morly Alinio