TONI GONZAGA, NAGPAALAM NA SA ASAP AT SA HOME SWEET HOME

​​Ang dahilan pala kaya ayaw mag kuwento ng mag asawang Toni Gonzaga at direk Paul Soriano noong two months pa lang ang sanggol na dinadala sa sinapupunan ng aktres ay naniniwala ang mag asawa sa pamahiin. 
Kamakailan ay nagpahayag si Toni ng sobrang kagalakan dahil confirmed na nagdadalang-tao siya. Pero hindi pa raw ma-kumpirma ang kasarian ng sanggol na nasa sinapupunan kaya hindi pa sila makapamili ni direk Paul ng mga damit na gagamitin ng kanilang supling.

Base sa nakarating sa aming balita, bagama’t hindi twins ang sanggol na nasa sinapupunan ni Toni ay sobrang saya ng mag asawa dahil maagang dumating ang matagal na nilang inaasam na bunga ng kanilang pagmamahalan. Anuman ang maging gender ng magiging anak nila ay labis nilang ipagpapasalamat dahil ito ang regalong matagal na nilang pinangarap.
At dahil buntis, si Toni na mismo ang nagdesisyon na kailangan niyang pangalagaan at pahalagahan ang sanggol kung kaya’t mangangailangan siya ng sapat na pamamahinga upang masigurong ligtas at maayos ang kalusugan niya at ng kanyang sanggol. 
Nagpaalam na si Toni sa programa niyang Home Sweet Home kung saan kasama niya dito si John Lloyd Cruz. Maging sa ASAP ay hindi na rin mapapanood ang aktres dahil hindi ito puwedeng ma-stress at mapagod.
Buwan ang bibilangin bago muling humarap sa camera si Toni at tiyak na mananabik ang aktres sa kanyang kinasanayang gawain lalo pa at mahal nito ang buhay artista.
Ni Morly Alinio